لكي تنقب عن الذهب يجب ان تتسخ يديك بالتراب والطين!

اللي يشوف كثير من إدارات التوظيف في جهات العمل المختلفة يحس انهم منعزلين في ابراجهم العاجية ومكاتبهم الكريستالية وفي قاعات اجتماعهم الوردية، وخلف أبوابهم الموصدة، ويتباهون ببرامج التوظيف والتوطين عندهم، وسلايدات الباور بوينت زاهبه بس عشان يعرضون انجازاتهم الفذة يوم يناقشون انتاجيتهم لكل سنة، وتقيمات أداء أغلبيتهم ما تقل عن جيد جداً. بس في الواقع: حد شافهم مثلاً فاتحين في المناطق العامة والأسواق مكاتب دايمة للتوظيف؟ حد شاف مندوبيهم يمرون على تجمعات الشباب والشابات بشكل دايم مب بس في معارض التوظيف؟ حد منكم سمع أو مر بتجربة أن مندوب التوظيف ياله لين البيت يقوله يا فلان أو يا فلانة ترانا سمعنا عنكم كل الخير ونتمنى إنكم تشتغلون معانا! اللي يبي الذهب لا يترياه إييله! يروح ينقب عنه بنفس الطريقة اللي يتم فيها البحث عن المعادن الثمينة والغالية! جلسة القاعات ما بتيبلكم شي إلا الشي القليل.